Sulisorineqarsinnaasut

Sulisorineqarsinnaasut tassaapput najugaqavissut ukiui sulinissamut naleqquttut, 18-it 65-illu (2018-imi) akornanni ukiullit, taakku suliffeqarput imaluunniit suliffissaaleqisuupput. 2018-imi agguaqatigiissillugu qaammammut sulisorineqarsinnaasut 27.231-upput, taakkunannga 25.649-t sulipput 1.582-illu suliffissaaleqisutut nalunaarutigineqarsimallutik. Najugaqavissut ukiui sulinissamut naleqquttut katillugit 36.520-usimapput taakkunannga 9.289-it sulisorineqarsinnaasimanngillat, taakku innuttaasut 18-it 65-illu akornanni ukiullit sisamararterutigingajarilluinnarpaat, takussutissiaq 2.1. takuuk.

 

Takussutissiaq 2.1 2018-imi distriktini sulisorineqarsinnaasut

	Sulisorineqarsinnaasut			Sulisorineqar-sinnaanngitsut	Kalaallit Nunaanni najugaqavissut katillugit
	Katillugit	Suliffeqarneq	Suliffissaa-leqineq
	Inuit
Nuna tamakkerlugu1  ...	27.231	25.649	1.582	9.289	36.520
Nanortalik .......	712	594	118	337	1.049
Qaqortoq ........	1.511	1.383	128	515	2.026
Narsaq ..........	736	654	82	302	1.038
Paamiut .........	656	588	68	270	926
Nuuk ...........	9.652	9.334	318	2.652	12.304
Maniitsoq ........	1.614	1.507	107	486	2.100
Sisimiut .........	3.058	2.946	112	907	3.965
Kangaatsiaq .....	536	463	73	252	788
Aasiaat .........	1.454	1.370	84	680	2.134
Qasigiannguit ....	562	536	426	161	723
Ilulissat .........	2.307	2.239	68	870	3.177
Qeqertarsuaq ....	391	373	18	153	544
Uummannaq .....	1.101	1.068	33	394	1.495
Upernavik .......	1.166	1.129	37	545	1.711
Qaanaaq ........	306	278	28	174	480
Tasiilaq .........	1.258	992	266	497	1.755
Ittoqqortoormiit ....	147	132	15	78	225

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARNSTK1

Nassuiaat: 1) Kommunit avataanniittut Nuna tamakkerlugumut ilanngunneqarput.

 

Titartakkami 2.1-imi takuneqarsinnaavoq 2014-imiit 2018-imut sulisorineqarsinnaasut ukununnga immikkoortillugit sulisut aamma suliffissaaleqisut. Sulisorineqarsinnaasut sulisunit aamma suliffissaaleqisunit amerlaqatigiiaarnerunerat malunnarpoq. Kisianni aasaanerani sulisut assigalugit sulisorineqarsinnaasut amerlanerusarput. Piffissami 2014-imiit 2018-imut 3. kvartalimi sulisorineqarsinnaasut amerlanerpaanngortarput, 1. kvartalimut sanilliullugit 500-900-inik amerlanerusarlutik, 1. kvartalimi sulisinnaasut ikinnerpaasarput. 2017-imi aamma 2018-imi 2. Kvartalimi sulisorineqarsinnaasut amerlanerpaajupput. Paatsoortoqannginniassammat maluginiaqquneqarpoq titartagaq 21.000-init aallartittoq, arealimilu sulisorineqarsinnaasut aamma suliffissaaleqineq imminnut ataqatigiinnerat pineqanngimmata.

 

Titartagaq 2.1 Sulisorineqarsinnaasut

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARNSTK1

Malugiuk. 2017-imi januaarip aallaqqaataani 66-inik ukiullit utoqqalinersiaqartalerput siusinnerusukkut 65-inik ukiullit utoqqalinersiaqalersartut. Taamaattumik 2017 aallarnerfigalugu sulisinnaasut 18-it 65-illu akornanni ukioqartalerput. Ukiuni siuliinit sulisorineqarsinnaasut 18-it 64-illu akornanni ukioqartarput!

 

Sulisorineqarsinnaasut ukioqatigiiaannut immikkoortillugit erserpoq 30-it 54-illu akornanni ukiullit sulisorineqarsinnaasut amerlanersaasut, titartagaq 2.2. takuuk. 30-it 54-illu akornanni ukiullit sulisorineqarsinnaanngitsut ikinnerpaapput. 2018-imi najugaqavissut 30-it 54-illu akornanni ukiullit 81 pct.-it sulisorineqarsinnaasimapput.

 

Titartagaq 2.2 2018-imi ukioqqortussutsini assigiinngitsuni sulisorineqarsinnaasut amerlassusii

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARNSTK1

 

Sulisorineqarsinnaasut ukiui sulinissamut naleqquttut amerlassusaat distriktini assigiinngiiaarput, titartagaq 2.3 takuuk. 2018-imi Nuummi sulisorineqarsinnaasut 18-it 65-illu akornanni ukiullit 78,4 pct.-iusimapput Qaanaap distriktiani 63,8 pct.-iusimasut. Nuna tamakkerlugu innuttaasut akornanni sulisorineqarsinnaasut 74,6 pct.-iusimapput.  

 

Titartagaq 2.3 2018-imi distriktini sulisorineqarsinnaasut amerlassusii

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARDSTK1

 

Sulisorineqarsinnaasut ilinniarsimassusaat apeqqutaasorujussuuvoq. Ilinniarsimasaq qaffakkiartortillugu sulisorineqarsinnaaneq qaffakkiartortarpoq, titartagaq 2.4 aamma takussutissiaq 2.2. takukkit.

2018-imi ukiui sulinissamut naleqquttut ingerlaqqiffiusumik ilinniarsimasut 92 pct.-iupput innuttaasullu inuussutissarsiornermik ilinniarsimasut 83 pct.-iullutik. Akerlianik meeqqat atuarfianni ilinniarsimasut 61 pct.-ii sulisorineqarsinnaapput. Innuttaasut akornanni sulisinnaasut akornanni ukiullit qaffasinnerpaamik ilinniarnertuunngorsimasut aamma qaffassarlutik pikkorissarsimasut 71 pct.-iullutillu 76 pct.-iupput.

 

Titartagaq 2.4 2018-imi ilinniarsimasat qaffasinnerpaat tunngavigalugit sulisorineqarsinnaasut amerlassusii

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARNSTK2

 

Takussutissiaq 2.2 2018-imi ilinniarsimasat qaffasinnerpaat tunngavigalugit sulisorineqarsinnaasut

	Sulisorineqarsinnaasut			Sulisorineqarsin-naanngitsut	Kalaallit Nunaanni najugaqavissut katillugit
	Katillugit	Suliffeqarneq	Suliffissaa-leqineq
	Inuit
Katillugit .....................................	27.231	25.649	1.582	9.289	36.520
Meeqqat atuarfii ...............................	14.329	12.998	1.331	7.151	21.480
Ilinniarnertuunngorniarfiit .........................	1.381	1.354	27	515	1.896
Inuussutissarsiornermik ilinniarfiit katillugit ............	7.288	7.084	204	1.232	8.520
- Eqqumiitsuliorneq aamma humaniora...............	168	161	7	41	209
- Inuussutissarsiorneq, allaffissorneq inatsisilerinerlu....	1.655	1.621	34	191	1.846
- Ingeniørinngorniarneq, tunisassiorneq sanaartornerlu..	2.127	2.085	42	301	2.428
- Nunalerineq, orpippassualerineq, aalisarneq uumasunullu nakorsaqarneq ...............................	254	238	16	80	334
- Peqqinnissaq atugarissaarnerlu...................	1.570	1.530	40	312	1.882
- Kiffartuussinermi ilinniakkat......................	1.428	1.363	65	303	1.731
- Allat  .....................................	87	86	1	3	90
Qaffassarluni pikkorissarneq ......................	254	251	3	76	330
Ingerlaqqiffiusumik ilinniarneq .....................	3.981	3.963	18	313	4.294

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARNSTK2

 

2018-imi agguaqatigiissillugu qaammammut sulisorineqarsinnaasut 27.231-t akornanni 7.288-it inuussutissarsiummik ilinniagaqarsimapput. Taamaasilluni Inuussutissarsiummik ilinniarsimasut meeqqat atuarfianni ilinniarsimasunit qaffasinnerusumik ilinniarsimasuni amerlanerpaapput. Titartakkami 2.5-imi sulisorineqarsinnaasut akornanni ilinniarsimasut sunik ilinniarsimasuuneri takuneqarsinnaavoq.

 

2018-imi inuussutissarsiummik ilinniarsimasut akornanni Nunalerineq, orpippassualerineq, aalisarneq uumasunullu nakorsaqarnermik ilinniarsimasut (ass. aalisartunut ikiortit aamma qalulerisut) 24 pct.-ingajaat sulisorineqarsinnaasimanngillat. Inuussutissarsiummik Allamik ilinniarsimasut (ass. IT-mik aqutsinermik ilinniagallit) akerlianik 3,3 pct.-it sulisorineqarsinnaasimanngillat. Takussutissiaq 2.2 malillugu Allamik ilinniagallit ikipput, 2018-imi taamaallaat 90-iupput.

 

Titartagaq 2.5 2018-imi inuussutissarsiummik ilinniarsimasat tunngavigalugit sulisorineqarsinnaasut amerlassusii

Najoqqutaq: Naatsorsueqqissaartarfiup kisitsisaataasivia: http://bank.stat.gl/ARNSTK2